A.N. P 1377/2, cote n° 2889
Loys, duc de Bourbonnois, conte de Clermont, de Forez, per et chambrier de France, à nostre amé escuier Pierre de Maizac, capitaine de Murat, salut. de la partie de Pierre de Bor, capitaine de Saint-Bonnet de Fours, pour notre très chère dame et mère, nous a esté signiffié que comme à la requeste et instance des habitans demorans en la ville et paroisse dudit Saint-Bonnet et des villages de Bor, des Landes et de Teilhis, nostre dite dame et mère par ses lettres eust octroyé ja pieça aus diz habitans que ledit lieu de Saint-Bonnet il peussent emparer et faire fort afin de retraire eulz et leurs biens en icellui en cas de besoing. Et pour (raison ?) d’icellui octroy, les diz habitans eussent et aient promis maintenir ledit fort de toute réparacions néccessaires à fait de forteresce et de y faire guet et garde de jour et de nuit et à ce se feussent et soient obligés. Néantmoins depuis ce les diz habitans sont venus par devant nous soubz umbre d’aucunes choses que il nous ont donné à entendre, ont obtenu lettres de nous par lesquelles nous vous mandons que les habitans vous contraignissiez à faire guet et garde à Murat jusques à ce que par nous autrement en feust ordené. (Biffé : les a par vertu desquelles lettres vous les diz habitans) les quelles choses ont esté sont faites au grant grief et préjudice de notre dite dame et mère actendu la dicte obligacion, actendu aussi que ou dit fort notre dite dame et mère a ses greniers où elle fait retraire ses grains qui pourroient dépérir et tourner en ruyne si lesdit fort n’estoit maintenu si comme par ledit capitaine nous a esté signifié en nous humblement suppliant sur ce gracieusement pouveoir. Pourquoy, nous, par considéracion des choses dessus dites nous plaist et voulons que non obstant les dictes lettres obtenues de nous par lesdits habitans, iceulx habitans voisent doresenavant faire guet et garde oudit lieu fort de Saint-Bonnet et contribuent à la fortificacion et réparacion dudit fort par la fourme et amnière que tenus y sont et qu’il faisoient et ont acoustumé de faire par avant la date de noz dernières lettrres par lesdits habitans obtenues, et voulons iceulx habitans estre à ce contrainct par ledit capitaine, ses commis et députez par toutes voyes deues et raisonnables, et vous mandons que doresenavant vous ne contraigniez les diz habitans à faire ledit guet audit lieu de Murat et du contenu en ces présentes laissiez joir et user ledit capitaine sans le molester au contraire. car ainsi nous plaist il estre fait. Donné à Molins soubz nostre seel le VIIIème jour d’avril l’an de gâce mil CCC iiiiXX avant Pasques.
Par le conseil estant en la chambre
des comptes ouquel monseigneur le lieutenant estoit.
J Bremont