Vente de vigne, valeur comptable de l'écu d'or en 1402

[Jehan]

AN – P13552, cote 124

A tous ceulx… Guillaume, seigneur de Tignonville, chevalier, conseiller et chambellan du Roy nostre sire, garde de la prévosté de Paris, salut.

Savoir faisons que pardevant Jehan Tauconeau et Jehan Delanoë, clers, notaires du Roy nostre sire de par lui establiz ou Chastellet de Paris, fu personnellement establi Charlot Felis, varlet de chambre de très noble et puissant et excellant prince monseigneur Loys, duc de Bourbonnois, conte de Forestz, baron et seigneur de Beaujeu, per et chamberier de France, lequel.. recongnut et confessa avoir vendu, quitté, cédé, transporté… audit monseigneur Loys, duc de Bourbonnois, acheteur… deux pièces de vigne si comme elles se comportent que ledit vendeur se disoit avoir, tenir et possider de son conquest ou terrouer de Chantemilan, en la chastellenie de Verneul en Bourbonnois, l’une pièce tenant d’une part à la vigne Thèvenin Puresoille et d’autre part au chemin ou sentier qui va de la maison du prieuré d’Yseure à la vigne de Guillaume Laurens / et l’autre pièce tenant aux charroies communes dudit prieuré d’Yseure par-dessus / et d’autre part par dessoubz à la vigne d’icellui prieuré / chargé des cens et charges qu’elles doivent d’ancienneté aus seigneurs dont elles sont mouvans et tenues, sans autre charge.

Ceste vente faite pour et parmi le pris et somme de quatre cens livres tournois monnoye courant à présent, l’escu d’or à la couronne du coing du Roy nostre sire pour vint deux solz six deniers tournois que ledit vendeur en confessa avoir euz et receuz dudit monseigneur le duc…

.. le lundi second jour d’ottobre l’an de grâce mil CCCC et deux

Delanoë
Taconeau